Ish-kryeprokurori Adriatik Llalla i ka blerë një personi të dënuar për vrasje dhe të akuzuar për një seri të pafund akuzash të tjera nga policia dhe drejtësia shqiptare një super-pronë në një nga zonat me ekskluzive dhe të lakmuara të Tiranës.
AlpetNews ka siguruar një dokument, ku rezulton se Llalla ka bërë një blerje me një çmim tejet qesharak.
Dokumenti i skandalit tregon se si Adriatik Llalla i ka blerë Eduart Dushkut nga Sauku i Tiranës një pronë në Tiranë. Dushku, sot 42 vjeç, rezulton se është i dënuar për vrasje, armëmbajtje pa leje e plagosje, arratisje nga vendi i vuajtjes së dënimit dhe akuza të tjera, si shpërthim me lëndë plasëse dhe dëmtim të pronës, dhune, etj.
Bëhet fjalë për 3.000 metra katrorë ullishtë në një nga zonat e lakmuara te periferisë se Tiranes.
Çmimi i blerjes së gjithë kësaj prone është totalisht qesharak: Vetëm 1 milion e 500 mijë lekë ose e barabartë me 500 lekë për metër katrorë.
Pyetjet që lindin janë: Çfarë fshihet pas këtij operacioni financiar?! Çfarë shërbimi serioz i ka ofruar në këmbim të kësaj shitblerje qesharake ish-kryeprokurori i Shqipërisë një personi të dënuar për vrasje dhe një serial krimesh të tjera?
Eduart Dushku u arrestua sërish të enjten e javës se kaluar, më 1 mars 2018 gjatë një operacioni policor me emrin e koduar “Përsëritësi”.
Njoftimi i policisë së Tiranës, për arrestimin e EDUART DUSHKUT, e ENJTE 1 MARS 2018:
Strukturat e Drejtorisë Vendore të Policisë Tiranë kanë finalizuar me sukses operacionin policor “Përsëritësi”, ku është bërë i mundur arrestimi në flagrancë, për veprat penale të “Prodhimi dhe shitja e armëve luftarake” dhe “Largimi nga vendi i vuajtjes së dënimit”, i shtetasit:
- Eduart (Edison) Dushku, 42 vjeç, lindur në Tiranë, i dënuar më parë për veprat penale: “Vrasja me dashje”, “Shkatërrimi i pronës me eksploziv’’ dhe “Prodhimi dhe mbajtja pa leje e armëve luftarake”.
Kapja në flagrancë e këtij shtetasi u bë në rrugën e Elbasanit, ku gjatë kontrollit personal i është gjetur dhe sekuestruar në cilësinë e provës materiale:
- Një armë zjarri pistoletë e tipit “TT” model 54 me kalibër 7.62 mm, me një krehër me 8 fishekë.
Gjithashtu gjatë kontrollit në banesën e këtij shtetasi, janë gjetur dhe sekuestruar në cilësinë e provës materiale:
- Një armë zjarri automatike “Kallashnikov” 7.62 ,
- Njëmbëdhjetë fishekë pistolete model “Makarov”,
- Tetë kapsolla detonatore,
- Dy maska,
- Aparat celular i tipit “IPhone 7” me kartë SIM.
- Aparat celular i tipit “Samsung S7” me kartë SIM.
- Aparat celular i tipit “IPhone 8” me kartë SIM.
Gjithashtu për këtë shtetas, Gjykata e Shkallës së Parë Tiranë, me vendimin nr. 1995, datë 08.09.2017, kishte ndryshuar masën e sigurisë nga “Arrest me burg”, për veprën penale të “Shkatërrimi i pronës me zjarr”, duke e zëvendësuar me masën e sigurisë “Arrest shtëpie”.
Shtetasi në momentin e arrestimit ishte me masë sigurie “Arrest shtëpie”.
Nga ana e jonë u kryen veprimet e para proceduriale dhe materialet në ngarkim të shtetasit Eduart Dushku, do t’i kalojnë Prokurorisë për veprat penale “Prodhimi dhe shitja e armëve luftarake” dhe “Largimi nga vendi i vuajtjes së dënimit” të parashikuara nga nenet 278 dhe 323 e Kodit Penal.
Eduart Dushku, rezulton me precedentë penale për veprat penale: “Dëmtime të tjera me dashje”, “Shkatërrimi i pronës”, “Vrasja me dashje e kryer në bashkëpunim”, “Armëmbajtja pa leje”, “Dhunë në familje” ,”Kallëzim të rremë”, “Shkatërrimi i pronës me zjarr”, “Shkatërrimi i pronës me eksploziv”.
Materialet do t’i kalojnë Prokurorisë së Rrethit Gjyqësor Tiranë, për veprime të mëtejshme.
