Një tjetër fenomen është denoncuar nga qytetarë të shumtë të Tiranës, ku hedhin dritë mbi abuzimet e UKT-së mbi kurrizin e tyre.
Me qindra qytetarë janë befasuar kur kanë marrë faturën e rradhës së ujit dhe kanë parë se përveç tarifës së shpenzuar i është shtuar edhe një shumë prej 50 mijë lekësh të vjetra.
Kjo shumë është vendosur për zëvëndësimin e sahatit të ujit. Sipas justifikimit të UKT-së, punonjësit e saj po zëvëndësojnë sahatët e vjetër me ato të rinj aty ku është e nevojshme.
Abuzimi lind në faktin sepse asnjë prej qytetarëve nuk është vënë në dijeni të këtij ndërrimi. Ata janë informuar në momentin kur kanë marrë faturën.
Si ka mundësi që qytetarët nuk vendosen në dijeni më përpara për ndërrimin e sahatit?
Një tjetër shkelje është mungesa e transparencës, pasi punonjësit e UKT-së edhe pse i ndërrojnë sahatët në fshehtësi, nuk japin asnjë proces verbal për ndërrimin që kanë bërë.
Kjo skemë duhet se favorizon xhepat e UKT dhe firmës që mbulon këtë institucion me sahatët e matrikolluar.
Vetë qytetarët shprehen se kjo është një tjetër manovër për ti vjedhur ata dhe tashmë justifikimi është tek sahatët e vjetër.
