Përgjimet e reja të publikuara nga “Marca” mund të hapin skenarë të rëndësishëm në botën e futbollit. Skandali i radhës ka goditur Federatën Spanjolle të Futbollit, që është në qendër të një sistemi korruptues që përfshin shumë drejtues. Mes këtyre, korrikun e kaluar, kanë përfunduar në pranga presidenti Angel Maria Villar, zëvendësi i tij Juan Padron, djali Gorka Villar dhe drejtues të tjerë të Rfef.
Sipas të përditshmes spanjolle, përgjimet e reja kanë hedhur më shumë dritë mbi atë që ndodh në botën e futbollit iberik. Kjo tregohet qartë në një bashkëbisedim mes Juan Padron, zëvendëspresidenti ekonomik i Federatës, dhe sekretares Esther Gascon: “Presidentët, trajnerët, arbitrat bëjnë atë që them unë. Duhet t’i binden atij që i paguan. E kuptove Esther? Kjo gjë ndodh prej 32 vitesh”. I njëjti koncept është shprehur edhe nga Miguel Bestar, presidenti i Federatës së Futbollit të Ishujve Baleare: “Arbitrat e mi dhe trajnerët e mi votojnë si them unë. Përndryshe i largoj!”.
Akuza është krijimi i një rrjeti kontaktesh, mes miqsh dhe njerëzish të besuar, për të mundësuar zgjedhjen e vazhdueshme të Presidentit të Federatës, me synimin që të ruhej mbarëvajtja e operacioneve të paligjshme. Në fakt, përgjimet kanë zbuluar ekzistencën e një sistemi për manipulimin e votave në favor të ish-zëvendëspresidentit të FIFA-s. Joge Miguel Monje, president i Federatës së krahinës së Murcias, gjatë një telefonate me Gorka Villar: “Kemi humbur dhe rikuperuar një lojtar. Këta duhen nxitur, nëse nuk vijnë të votojnë. Nga 250 kanë ardhur vetëm 90. Mos harro, këtë gjë e dini ti dhe babai yt, nuk duhet të dalë prej këtu”.
Në fund, është publikuar edhe dialogu mes babait dhe djalit, Angel dhe Gorka Villar: “Dje ka dalë një lajmërim nga Federata që i lejon klubet ta delegojnë votën. Kam marrë në telefon Larrean që t’i shkruajë Eibar-it dhe të na thotë nëse kanë votuar. Nëse nuk e kanë bërë, ta delegojnë votën”.
