Në spitalin Rajonal të Beratit të sëmurët kronikë, presin me orë të tëra në temperatura të larta dhe në kushte aspak të përshtatshme vizitën tek mjeku kardiolog.
Ky i fundit, krejtësisht i vetëm në spital, i duhet të përballojë mbi 100 vizita në ditë. Kardiologu Julian Ranxha, përveç profilit të tij si doktor zemre, i duhet të bëjë edhe gjinekologun me gratë shtatzëna që kërkojnë ndihme mjekësore.
“Kam shumë ngarkesë dhe i vetëm duhet të përballojë jo vetëm vizitat në Repartin e Kardiologjisë, por edhe konsultat e spitalit, të sëmurët kardiakë të reanimacionit të shtruar në patollogji, konsultat e kirurgjisë për të sëmurët që duhet të operohen, konsultat e gjinekologjisë për gratë shtatëzëna, fëmijët në pediatri që kanë probleme të lindura, ndërkohë që duhet të jetë njëkohësisht në gadishmëri për të gjitha urgjencat nga problemet e zemrës,ditën dhe natën” thotë mjeku Julian Ranxha për Televizionin Publik Shqiptar.
Kjo situatë duket se ka dalë jashtë kontrollit në këto dite temperaturash të larta, ku sëmundshmëria është shtuar ndjeshëm. Në disa raste kardiologut Ranxha i duhet të shoqërojë të sëmurët rëndë drejt QSUT në Tiranë për trajtim më të specializuar, duke i lënë ata të Beratit në mëshirë të fatit, pasi e ka të pamundur të jetë në të njëjtën kohë në dy vende.
