Ka përfunduar në barazim pa gola në “Selman Stermasi”, sfida mes Partizanit dhe Skënderbeut. Ndeshje me intensitet mjaft të artë, ku të kuqtë kanë dominuar pjesën më të madhe të takimit, me një Skënderbe që zgjohet vetëm në minutat e fundit. Kjo pasi duke pasur parasysh edhe intensitetin e madh të ndeshjeve që kanë pasur korçarët në ditët e fundit, kanë ndjerë lodhje. Ka pasur raste të shumta për të kuqtë me Trashin dhe Sukaj që shpërdorojnë dy raste të arta për të fituar ndeshjen. Po ashtu vlen të përmendet që në minutën e katërt Prognit i është anuluar një gol për pozicion jashtë loje, por që është një pozicion mjaft i dyshimtë. Me këtë barazim Skënderbeu shkon në kuotën e 28 pikëve në vendin e parë, ndërsa Partizani ka 13 pikë më pak se ata dhe mbanë vendin e gjashtë.
Pjesa e parë ka përfunduar me një rezultat të bardhë pa gola, por me një Partizan dominues në fushë. Korçarët luajnë më tërhequr dhe nuk anë shumë të interesuar për të sulmuar në këtë pjesë të parë. Rastet më të mira për shënim i ka pasur Partizani, ku në minutën e katërt Progi e dërgon topi në rrjetë por që arbitri e vlerëson me pozicion jashtë loje dhe goli nuk vlen.
Ndërsa Skënderbeu kishte një rast të mirë shënimi pas një shpërthimi në krah të Gavazajt, por që Soue nuk arrin ta godasë si duhet topin me kok. Aty përfiton James që stopo topin me gjoks dhe godet fluturimthi, por pa e vënë në vështirësi portierin Alban Hoxha. Batha i është afruar golit, duke lëshuar një predhë nga jashtë zone, por që Shehi me vështirësi e largon topin. Një pjesë e arë mjafte bukur por që munguan golat.
Pjesa e dytë nis me të njëjtat ritme ku të kuqtë janë më kërkues për golin dhe krijojnë ë shumë raste të rrezikshme. Daja nuk mendon të ndryshojë skemë dhe të hidhet në sulm por vazhdon të presë në mbrojtje. Lorenc Trashi ka pasur rastin e artë në këtë pjesë të dytë për të zhbllokuar ndeshjen,por goditja e tij ishte për tu harruar. Pas një krosimi nga e djathta, topi nuk largohet si duhet nga Osmani dhe përfundon në këmbët e Trashit, i cili kishte të gjithë kohën e mundshme për ta qetësuar topin e më pas të godiste, por zgjedh të godasë fluturimthi dhe gabon. Të gjithë duart në kokë në stolin e Partizanit për këtë rast të humbur. Në 15’ minutat e fundit ka një rritje të ritmit nga ana e korçarëve, të cilët hidhen në sulm dhe janë mjaft të rrezikshëm me Soue dhe James. Por e kanë të pamundur të godasin seriozisht portën e mbrojtur nga Alban Hoxha, pasi mbrojtja e të kuqve është e vendosur mjaft mirë. Në sekondat e fundit të takimit sulmuesi shkodran, Xhevahir Sukaj ka humbur një rast të pastër shënimi, pasi ka qenë i vetëm përballë Shehit dhe gjuajtja e tij drejt portës ishte për tu harruar.
