Koronavirusi ka prekur shumë sektorë të ekonomisë dhe biznesit në të gjithë botën. Futbolli është gjithashtu një nga fushat e prekura nga kjo pandemi.
Një lajm i keq vjen nga Uellsi në Britaninë e Madhe, teksa mësohet se një skuadër e klubit të kategorisë së 2-të ka falimentuar për shkak të COVID-19.
Bëhet fjalë për skuadrën Rhyl FC, e cila ka mbyllur dyert pas 141 vitesh ekzistencë.
Presidenti i klubit, Pol Higinson tha se vendimi u mor nga bordi drejtues, pasi u shqyrtua ndikimi financiar nga pezullimi i futbollit.
“Është një ditë tepër emocionuese për të gjithë ata që kanë lidhje me klubin. Jemi të gjithë tifozë dhe e ndjejmë thellë këtë vendim. Vendimi i vështirë u mor nga bordi drejtues, pasi u shqyrtua ndikimi financiar nga pezullimi i futbollit, për shkak të pandemisë”, tha ai në një deklaratë për mediat.
