Një nga njerëzit më të besuar të kryeprokurores Arta Marku, ka dhënë dorëheqjen, pasi nuk ka pranuar që të hetojë 10 kolegët e tij të Krimeve të Rënda. Sokol Stojani ka dhënë dorëheqjen nga detyra, si kreu i Drejtorisë së Inspektimit në Prokurori.
Ai nuk ka pranuar të hetojë 10 kolegët e tij, pas urdhërit të djeshëm të Arta Markut, për procedim disiplinor ndaj tyre.
Një ditë më parë, kryeprokurorja vendosi hetimin disiplinor për 10 prokurorët e Prokurorisë së Krimeve të Rënda në Tiranë, dhe transferimin e tre të tjerëve në rrethe, pasi refuzuan të merrnin në dorëzim hetimin e çështjes Shullazi.
Burimet bëjnë me dije se 10 prokurorët në fjalë, në mënyrë unanime kanë vendosur të kallëzojnë Arta Markun, për “shpërdorim detyre”. Ndër të tjera ata kanë ngritur edhe padi civile, për shfuqëzimin e urdhërit të Markut.
Një ditë më parë Prokurorja e Përgjithshme, Arta Marku, urdhëroi hetimin disiplinor për prokurorët Olsian Çela, Sonila Muhametaj, Besim Hajdarmataj, Përparim Kullurin, Behar Dibrën, Arenc Çelën, Edvin Kondilin, Pranvera Pustinën, Eugen Beçin dhe Blerim Tominajn.
Po ashtu Marku vendosi transferimin e përkohshme në rrethe të prokurorëve të cilët refuzuan hedhjen e shortit për dosjen e Shullazit. Bëhet fjalë për prokurorët: Olsian Çela, i cili do të transferohet në Prokurorinë e Beratit, Sonila Muhametaj, e cila do të transferohet në Prokurorinë e Pukës dhe Besim Hajdarmatajn, i cili do të transferohet në Prokurorinë e Pogradecit.
https://tiranatoday.com/merr-fund-ping-pongu-i-ceshtjes-shullazi-caktohen-prokuroret-emrat-mbahen-te-fshehte/
