Nevoja për të forcuar një aleancë aziatike kundër kërcënimit ushtarak në rritje të Koresë së Veriut, sipas Shtëpisë së Bardhë, tejkalon shqetësimet rreth masave të ashpra të presidentit Rodrigo Duterte kundër trafikut të drogës.
“Nuk ka asgjë më kërcënuese me të cilën po përballet tani ky vend dhe rajoni aziatik sesa ajo që po ndodh me Korenë e Veriut“, tha shefi i kabinetit në Shtëpinë e Bardhë, Reince Priebus, në një intervistë për rrjetin mediatik ABC.
Kjo është arsyeja përse Shtëpia e Bardhë doli dje në mbrojtje të ftesës që presidenti Donald Trump i ka bërë homologut të tij të Filipineve, për të vizituar Uashingtonin. Një zëdhënës i presidentit Duterte tha se presidenti Trump i kishte thënë atij në telefon, se ishte i interesuar për zhvillimin e “një marrëdhënie të ngrohtë pune”.
Veprimet e presidentit Duterte kundër trafikut të drogës janë dënuar globalisht dhe cilësohen si të dhunshme. Duterte u ka bërë thirrje të papunëve në vendin e tij që të gjejnë punë, duke vrarë përdoruesit e drogës. Masat e tij kanë nxitur zemërimin e Kombeve të Bashkuara dhe të shumicës së vendeve perëndimore.
