Studentë nga të gjithë fakultetet e Universitetit të Tiranës, atij Bujqësor të Kamzës dhe nga rrethe të tjera të vendit po mblidhen këtë të hënë në ditën e 13-të të protestës së tyre.
Nga përpara Ministrisë së Arsimit ku protestuan për shumë ditë me radhë, qendra e protestës studentore tashmë është zhvendosur përpara Kryeministrisë.
Ftesave të përsëritura të Kryeministrit Edi Rama për dialog, studentët i janë përgjigjur prerazi me refuzim pa plotësuar më parë 8 kërkesat e tyre.
Por, sot në shenjë protestë u kanë vënë kyçin dyerve dhe portave të universiteteve. Ata duket sa janë të palëkundur dhe duan t’i shkojnë deri në fund plotësimit të kërkesave të tyre.
Prej 13 ditësh studentët kanë parashtruar 8 kërkesat e mëposhtme për t’i dhënë fund protestës:
1-Rritja e buxhetit me 5 % e GDP me qëllim mundësimin e përgjysmimit të tarifës së studimit për çdo nivel studimi, përmirësimin e mësimdhënies dhe infrastrukturës, Universitet/konvikt.
2-Transparencë me buxhetin nga Ministria e Arsimit, Sportit dhe Rinisë dhe IAL-ve, publikimi i të gjitha shpenzimeve online.
3-Rritja nga 10 % në 50 % e peshës totale të votës së studentëve për të zgjedhur kandidatët për dekan, rektor dhe çdo fakultet të ketë një përfaqësues të studentëve në senatin akademik.
4-Rishikim i titujve akademikë dhe verifikimi i plagjiaturave të doktoraturave dhe teksteve mësimore.
5-Mbështetur në nenin 99 mbi Këshillet e Studentëve, Ligji i Arsimit të lartë, pika 2 kërkojmë që Bordi i Administrimit të IAL-ve të ketë numër të barabartë votash si nga MASR dhe IAL-të si dhe të shtohen një përfaqësues në këtë bord nga studentët.
6- Pajisja e të gjithë studentëve me Kartën e Studentit brenda vitit akademik 2018-2019 (të ndiqen nga bashkitë përkatëse).
7-Ndërtimi i një biblioteke me standarde Europiane dhe me libër universitar online, falas për studentët në gjuhën shqipe.
8-Vlerësim i perfomancës në mësimdhënie dhe kërkim shkencor i pedagogut, publikim i tij, online dhe regjistrimi i leksioneve.
