Ministri i Jashtëm gjerman, Sigmar Gabriel, tha në një konferencë në Berlin se Bashkimi Evropian duhej të punojë më shumë në mënyrë që mbështetja e gjerë e BE-së ndaj vendeve të Ballkanit Perëndimor të bëhet më e dukshme.
Këto komente Sigmar i bëri në një konferencë për Evropën Juglindore të mbajtur në ambasadën çeke në Berlin.
Sigmar Gabriel bëri thirrje për hapa konkrete në mënyrë që të shmanget humbja e interesit e vendeve të Ballkanit Perëndimor për anëtarësim në Bashkimin Evropian:
“Nuk duhet të ndodhë që në Serbi, për shembull, një pjesë e madhe e popullsisë sipas sondazheve ende beson se Rusia është mbështetësja më e madhe e vendit. Kur i hedh një vështrim Ballkanit, rajonin tonë fqinj, që është kaq i rëndësishëm për ne, shqetësohem për disa zhvillime atje. Prandaj jam i bindur se të gjithë ne, veçanërisht vendet e rajonit, duhet të punojnë më shumë për një të ardhme paqësore, të begatë dhe evropiane për Ballkanin Perëndimor dhe Europën në tërësi”, tha ministri i jashtëm gjerman.
