Rreth orës 02:00, në Kamëz është qëlluar me breshëri plumbash në një lokal dhe një banesë, e pak minuta më vonë ka shpërthyer eksplozivi. Fatmirësisht nuk raportohet për të lënduar, por vetëm për dëme të konsiderueshme materiale.
Nga të dhënat e para, mësohet se është qëlluar me armë drejt lokalit “Kaslin”, dhe drejt banesës që ndodhet në të njëjtën biznes. Si të mos mjaftonte kjo, pak minuta më vonë ka ndodhur një shpërthim eksplozivi.
Nga shpërthimi ka patur vetëm dëme materiale në lokal, dhe në makinat e parkuara para lokalit. Të njëjtat burime shtojnë se në ato çaste, në banesë ndodheshin familja Halili, pronarë të objektit, gra dhe fëmijë.
Ngjarja është regjistruar nga kamerat e sigurisë së lokalit, ku duken personat që qëllojnë me armë. Për të hedhur dritë mbi ngjarjen, policia ka bërë të mundur sekuestrimin e këtyre pamjeve.
Pjestarët e familjes Halili kanë thënë se nuk kanë konflikte, dhe nuk e dinë kush mund të jetë autor i sulmit. Lokali ndodhet tek “Bulevardi Blu”, rreth 500 m poshtë Bashkisë Kamëz.
