Klement Balili është vënë sërish në qendër të vëmendjes, teksa akuzohet për trafikim të lëndëve narkotike.
Për gazetën gjermane “Berliner Kurier”, Balili është përgjegjës për furnizimin e Evropës dhe Amerikës së Jugut me droga të forta, përkatësisht me kokainë dhe marijuanë.
“Berliner Kurier” ka publikuar një artikull të titulluar “Frikë nga përplasja e bandave, mafia shqiptare po nxit luftën për drogën”.
Në këtë artikull, përmendet një ngjarje e ndodhur në maj të 2017-ës në një pub në Berlin, ku ka pasur breshëri armësh, ndërsa një ndër agresorët, shkruan gazeta, ishte edhe Balili.
“Ai është një ndër kriminelët më të fuqishëm në Evropë, që kontrollon pjesën më të madhe të tregut evropian të kokainës dhe, në vendin e tij, në Shqipëri, ka punuar edhe në ministri. Quhet Klement Balili, i njohur ndryshe edhe si “Eskobari i Ballkanit”, duke iu referuar lordit të njohur të drogës në Amerikën e Jugut. Gjurmët e gjakut të Balilit janë gjetur edhe në Berlin.
Në maj të vitit 2017, nga një pub në “Rrugën Groninger”, në Wedding të Berlinit, pati disa të shtëna me armë automatike. Pavarësisht se u gjuajtën 26 plumba, fatmirësisht nuk u plagos askush. Çuditërisht, ndër shumë agresorët e tjerë, ishte edhe pronari shqiptar 34-vjeçar, me origjinë nga Kosova”, kështu e nis artikullin e saj Berliner Kurier, ndërsa shton se mafia e Balilit është e vendosur ta rrisë epërsinë e saj në tregun evropian:
“Sipas të dhënave nga autoritetet investigative të Europolit, mafia shqiptare, nën udhëheqjen e baronit të drogës Klement Balili, është e vendosur ta rrisë edhe më tej “epërsinë e saj në tregun europian të drogës.”
Kjo gazetë citon sërish Europolin, kur shkruan se përgjegjës për kthimin e Shqipërisë në një korridor për drogërat e forta është pikërisht Balili:
Sipas Europolit, Shqipëria është shndërruar tashmë edhe në një “korridor për drogat e forta”, sidomos për kokainën. Përgjegjës për këtë mund të thuhet se është Klement Balili, i cili, sipas të dhënave të Agjencisë Amerikane të Drogës, DEA, duket se ka kontakte të drejtpërdrejta me bosët e drogës në Amerikën e Jugut.
Gjashtë vrasësit heshtin
E pabesueshme! Në vitin 2014, megjithëse Balili ishte në fokus të Europolit dhe DEA-s, ai u emërua zyrtarisht nga qeveria shqiptare si drejtor i Transportit Rrugor në Ministrisë e Transportit, për t’u larguar nga ky pozicion pune vetëm pasi ndërkombëtarët ashpërsuan tonet kundër emërimit të tij. Aktualisht, droga e Klement Balilit po përmbyt Europën dhe Berlinin.
Mbetet ende e paqartë se deri në ç’masë është përfshirë Balili apo personat e tij në vrasjen e ndodhur në Weddinger në Berlin. Kjo pasi gjer më tani, asnjëri nga gjashtë atentatorët (27-40-vjeçarë) nuk kanë thënë asgjë përpara gjykatës. Deri në qershor janë parashikuar të zhvillohen edhe 20 procese të tjera gjyqësore.
