Deputetja Mesila Doda ka folur, për mediat, pas përfundimit të takimit me ambasadorët Lu, Vlahutin dhe Borchardt.
Doda i ka dhënë një “shuplakë” të fortë trojkës së ambasadorëve, teksa tha se këta të fundit nuk duhet të punojnë për vendosjen e diktaturës në vend dhe nuk duhet të përjashtojnë kurrsesi opozitën:
“Unë pata një bisedë jo shumë miqësore me ambasadorin e OSBE-së në Shqipëri, Borchardt, i cili ka deklaruar se mospjesëmarrja e opozitës do të jetë një problem, por do të jetë një fjali në raportin e OSBE-ODIHR-it, ndërsa ndryshimi i kodit dhe kërkesa për të dhënë më shumë transparencë, administrim dhe numërim të gjithë partive parlamentare në zgjedhje, ky po do të ishte një problem shumë i madh dhe ODIHR-i këtë nuk do ta lejonte. Kinezërira të tilla mendoj që nuk e ndihmojnë procesin, përveçse na përjashtojnë edhe në të tjerëve nga ky proces. Ose të gjithë palët do jenë kontrollues të sistemit, ose këta zotërinj që marrin rrogën këtu në Shqipëri do të duhej që të kuptojnë shumë mirë që ky vend nuk mund të kthehet dot më në një diktaturë dhe të mos punojnë për vendosjen e autoritarizmit dhe diktaturës në këtë vend. Këtë nuk do ta lejojmë me asnjë lloj mënyrë.”
E pyetur nga gazetarët nëse PDIU e mbështet kandidaturën e Metës për president, Doda tha:
“Ne kemi dhënë dje firmat për kandidaturën e zotit Meta, unë, Idrizi dhe Rakipi kemi firmosur. Megjithatë, nuk është kjo çështja për të cilën jemi mbledhur sot.”
