Ish-ambasadori i SHBA, Alexander Arvizu, është rikthyer në Tiranë për një vizitë disa ditore, por jo si një zyrtar. I ftuar në emisionin “Wake up” në “Top Channel”, Arvizu tregon se si e ka gjetur Tiranën dhe Shqipërinë katër vjet pasi përfundoi mandatin e tij, për t’i lënë vendin ish-ambasadorit Donald Lu.
Ai e komenton si një situatë të trishtë largimin e të rinjve dhe profesionistëve. Ish-ambasadori mendon se korrupsioni është ndër indikatorët kryesorë. Po kështu ai tha se është i vetëdijshëm se shqiptarët ikin për një jetë më të mirë, por mbetet me shpresë që kjo situatë të ndryshojë.
“Ky është një problem i madh. Kur isha këtu, impresionohesha nga të rinjtë shqiptarë, gjimnazistët dhe kur takon njerëz me energji dhe inteligjencë, e ardhmja është më e mirë. Por nëse largohen është një problem i madh, kjo sepse ka shumë gjera që nuk funksionojnë siç duhet, thjeshtë nuk funksionojnë. Ndoshta nga korrupsioni. Njerëzit frustrohen dhe largohen në SHBA, Europë. E ardhmja juaj është e trishtuar, e di që shqiptarët e duan vendin e tyre, pavarësisht sa të frustruar janë këtu. Detyrohen të largohen për një jetë më të mirë, por shpresoj të ndryshojë kjo gjë”, u shpreh Arvizu.
