Ndahet nga jeta e veja e shkrimtarit të ndjerë Dritëro Agolli, Sadije Agolli. Kjo e fundit mësohet se ka ndërruar jetë në Spitalin e Neurologjisë për shkak të një hemorragjie cerebrale, në moshën 76-vjeçare.
Dy vjet më parë, u nda nga jeta shkrimtari Dritëro Agolli.
Në një intervistë të dhënë pak ditë më parë për Ora News, Sadije Agolli u shpreh:
Këto dy vite kanë qenë shumë të vështira megjithëse unë jam munduar duke shkruar. E kisha shumë të vështirë ndarjen me Dritëroin, vitin e parë kam qenë krejt e humbur.
Kur vdiq Dritëroi dhe më bënë propozim për ta kthyer në muze, këtë dhe të Ismailit poshtë, por nuk doja se isha kaq e lidhur me kujtimet dhe me gjërat. Thoja që po të iki në një vend tjetër nuk do të mësohem dot dhe do të vdes e mjerë. Kurse kjo shtëpi më jep jetë, më jep frymë.
Kalova vetveten ç’është e vërteta. Këtu është e pasqyruar e gjithë jeta e Dritëroit, këtu ka shkruar, këtu ka punuar, këtu ka kaluar çdo gjë, prandaj them se do të bëhet një muze i bukur. Të gjithë gjërat e Dritëroit, duke rishikuar dhe librat e tij, them ai sikur nuk ka kaluar një jetë por sikur ka bërë dy jetë. Duke bërë rikonstruksionin e të gjithë pallatit, ky bëhet pallati i artistëve.
