Ish-futbollisti i Kombëtares dhe Tiranës, Skënder Hyka është ndarë nga jeta në moshën 74-vjeçare.
Hyka, i cili njihet nga gjithë sportdashësit si një lojtarët më të spikatur të klubit bardheblu ka ndërruar mëngjesin e sotëm krejt papritur, ndërsa lajmin e hidhur e ka bërë të ditur nga miku i tij, Bedri Alimehmeti.
Skënder Hyka u lind në vitin 1944 dhe të gjithë karrierën e tij e zhvilloi në klubin e vendlindjes, “17 Nëntori”, sot Tirana, në rolin e sulmuesit.
Shkollën e mesme e ka kryer në qytetin e lindjes Tiranë. Studimet e larta i kreu në Institutin e Kulturës Fizike dhe Sporteve në vitin 1968. Nga viti 1957 – 1974, ka luajtur futboll me të gjitha nivelet e Klubit Sportiv “17 nëntori“, që nga ekipet e moshave dhe deri tek skuadra e parë, duke qenë nga futbollistët kryesore të klubit.
Nga viti 1967-1974, ka qenë anëtar i ekipit shpresa dhe atij kombëtar në të gjitha aktivitetet e zhvilluara. Në vitet 1992 – 1995, ka qenë Sekretar i Klubit Sportiv Tirana. Në vitin 1997 ka qenë Sekretar i Përgjithshëm i Federatës Shqiptare të Futbollit. Nga viti 1992 e në vazhdim, ishte Anëtar i Komitetit Ekzekutiv të Federatës Shqiptare të Futbollit.
