Piktori i mirënjohur Sali Shijaku, ka ndërruar jetë në moshën 89-vjeçare. Prej disa ditësh, Shijaku ishte i shtruar në spital në gjendje të rëndë shëndetësore.
“Me hidhërim të thellë ju njoftojmë për humbjen nga kjo jetë të babait tonë Piktorit të Popullit, Nderit te Kombit Shqiptar Sali Shijaku. I Lehtë të qoftë dheu. I kushtove gjithë jetën artit dhe Shqipërisë”, shkruan djali i tij.
Sali Shijaku është nderuar me titujt “Artist i Merituar”, “Piktor i Popullit”. Shteti shqiptar e ka vlerësuar dhe nderuar kontributin e artistit me mjaft çmime dhe i ka akorduar disa Çmime Republike (1956, 1970, 1984, 1989). Në vitin 1969 ai mori titullin “Artist i Merituar” dhe në vitin 1979 “Piktor i Popullit”. Më 2004-ën ai u nderua me titullin “Nderi i Qarkut të Tiranës”.
Në fondin e GKA-së ruhen 92 vepra të artistit në pikturë dhe skulpturë, nga të cilat 19 vizatime (penë, karbon dhe flamastër), 7 punime në qeramikë dhe 1 në allçi. Një pjesë e koleksionit të veprave të Shijakut janë të ekspozuara në sallat kryesore të Galerisë Kombëtare të Arteve në Tiranë. Veprat e Sali Shijakut ndodhen në shumë vende të botës dhe sot janë pjesë e koleksioneve të koleksionistëve brenda dhe jashtë Shqipërisë.
