Ish-ministrja e Jashtme, Arta Dade, e ftuar në “Tempora” nga Sonila Meço në “Ora News”, fajësoi Ramën për mënyrën si drejton vendin, duke mos u kursyer me kritikat. Ajo nënvizoi se asnjëherë nuk ka qënë dakord me Ramën rreth mënyrës si drejton partinë dhe vendin.
Sonila Meço: Po t’ju kishte thirrur Rama për postin e ministres së Jashtme, do e kishit pranuar?
“Unë me z. Rama, edhe kur kam qenë në parti, kam pasur vështirësi të jashtëzakonshme për të bashkëpunuar me të. Fakti që unë refuzova të jem pjesë e kryesisë, është fakti që nuk kam qenë asnjëherë dakord me atë si drejton partinë dhe drejton sot vendin. Të gjitha mendësitë e tij janë transferuar në drejtimin e qeverisë dhe të vendit. Qeveria drejton dhe vendin.
Nuk jam dakord me atë që i dërgoi z.Rama të vetëshpallurit President të Venezuelës në emër të popullit shqiptar. Kryeministri nuk mund të shkruaj në emër të popullit shqiptarë, sepse në emër të popullit shqiptar flet Presidenti. Kjo tregon se mendësitë e z. Rama për drejtimin e vendit janë tejet të kufizuara. Neritani e tha me elegancë se drejton si artist. Ka pasur artistë që kur hyjnë në politikë, flasin si politikanë”, tha ajo.
