Pak kohë më parë, kryeministri Edi Rama e cilësoi emigrimin masiv të shqiptarëve si jo tragjike. E sigurisht që ky fenomen ndikon në plakjen e popullsisë shqiptare, teksa nga ana tjetër edhe lindjet kanë rënë në mënyrë masive.
E për të nxitur këtë fenomen, kryeministri Rama ka marrë vendimin që çdo fëmijë i lindur në 2019-ën të shpërblehet me 400 mijë lekë të vjetra, e nëse çiftet lindin fëmijën e dytë do të marrin 800 mijë lekë, ndërsa për fëmijën e tretë shpërblimi do të jetë 1 milion e 200 mijë.
Këtë Rama e përsëriti edhe sot gjatë një aktiviteti në prezantimin e flotës së re të ambulancave, në Sheshin “Nënë Tereza” në Tiranë. Madje, Rama shkoi më tej teksa këshilloi çiftet e reja që “të shtyjnë fort përpara”, e më tej të përfitojnë nga shpërblimet e qeverisë për lindjet.
«Krahas bursës për ekselentët do japim dhe bursën për ata që vijnë në jetë, bonusin e bebes. Kuptohet që ata që vijnë të parët do e kenë më të ulët, ata që vijnë të dytët do e kenë më shumë, ata që vijnë të tretët akoma më shumë, 400 të parët, 800 të dytët, 1200 të tretët dhe kur vijnë bashkë i marrin po bashkë njësoj. Binjakët marrin 800 të dy, të tretët marrin 1200 të tre. Kështu që duke iu uruar Gëzuar Vitin e Ri dhe duke iu uruar çifteve të reja që të shtyjnë fortë përpara, ju uroj të gjithëve shumë sukses në Urgjencën Kombëtare”, tha Rama.
