Presidenti Ilir Meta ka dekretuar 21 prillin si datë për regjistrimin në zgjedhjeve vendore 30 qershorin dhe sipër përllogaritjes së Kodit Zgjedhor, afati i fundit i subjekteve zgjedhore për t’u bërë pjesë e procesit elektoral, përkon me ditën e sotme.
Por, ky afat për regjistrimin në zgjedhjet vendore është shtyrë. Kjo pasi Kodi Zgjedhor ka parashikuar që partitë politike të mund të regjistrohen pranë Komisionit Qendror të Zgjedhjeve jo më vonë se 70 ditë nga data e zgjedhjeve.
Konkretisht, në nenin 64 të Kodit Zgjedhor specifikohet afati, ku theksohet se: “Çdo parti politike duhet të paraqesë kërkesën për t’u regjistruar si subjekt zgjedhor në KQZ jo më vonë se 70 ditë përpara datës së zgjedhjeve”.
Por dita e sotme përkon me ditë pushimi zyrtar dhe KQZ është e mbyllur, për rrjedhojë afati shtyhet për ditën e parë të punës që vjen. Duke qenë se sot është festa e Pashkëve katolike, dita zyrtare për rifillimin e punës është e marta e javës që vjen deri në orën 24:00, raporton Panorama.
Kodi Zgjedhor ka parashikuar një afat tjetër kohor për regjistrimin e koalicioneve në zgjedhje, që mund të jetë edhe mundësia e fundit për partitë që nuk kanë mundur të paraqiten në kohë pranë KQZ-së. Neni 65 i Kodit Zgjedhor flet për regjistrimin e koalicioneve në zgjedhje, ku thuhet se: “Dy ose më shumë parti politike të regjistruara si subjekte zgjedhore në KQZ, sipas nenit 64 të këtij Kodi, mund të regjistrohen në KQZ si koalicion zgjedhor në shkallë vendi, jo më vonë se 60 ditë përpara datës së zgjedhjeve. Partia politike pjesëmarrëse në një koalicion nuk mund të marrë pjesë në një koalicion tjetër dhe as të paraqesë kandidatë apo listë shumë-emërore kandidatësh jashtë koalicionit ku ajo bën pjesë”.
Kësisoj, sipas kësaj pike, afati i fundit për t’u regjistruar është dita e parë e muajit maj, që edhe kjo përkon në kalendarin e festave zyrtare. Praktikisht, duke ndjekur edhe praktikën e shtyrjes së afatit me partitë politike, edhe koalicionet zgjedhore do të kenë afat të fundit datën 2 maj për t’u bërë pjesë e procesit zgjedhor për zgjedhjet vendore të 30 qershorit.
