Daljet e ish-kryeparlamentares Jozefina Topalli, gjithmonë janë edhe më të rralla. Por ajo ka sulmuar haptazi kreun demokrat Basha, duke i përmendur edhe familjen. Topalli thotë se në kundërshtim me statusin e PD, ai nuk thirri as kryesinë, as Këshillin Kombëtar për t’u konsultuar, as për datën e Kuvendit, as për axhendën, as për çështjet politike të ditës dhe për humbjet e tij elektorale.
Si rrallë herë, ajo është marrë edhe me familjarët e kryedemokratit Basha. Ndër të tjera, Topalli thotë se për kandidatët për drejtues të mëdhenj të partisë, bashkive e deputetëve, ai mbledh kryesinë e shtëpisë.
“Gruaja, kunati, drejtoresha e bizneseve të kunatit, vjehrri dhe disa oligarkë vendosin, se kush dhe ku do kandidojnë në emër të PD”, shkruan ajo. Po kështu, Topalli tregon edhe një detaj interesant. Familja e tij nga gruaja nuk kanë votuar asnjëherë PD deri në 2005.
Në vazhdën e akuzave, Topalli shprehet se po të mos ishte Basha në krye të PD, Edi Rama do ishte rrëzuar një mijë herë, e do ishte harruar tani.
