Mirëmenaxhimi i burimeve ujore është një mangësi që ka sunduar në dekadën e fundit.
Ekspertët e sektorit japin alarmin, duke theksuar se është me rëndësi rritja e vigjilencës, ndërsa shtojnë se mungesa e menaxhimit mund të na kushtojë shumë dhe jo vetëm prej faktit se ndryshimet klimatike po luajnë rol në rritjen e ekstremiteteve të sasive në burimet ujore, por edhe sepse projeksionet tregojnë se po shkojmë drejt pakësimit.
Inxhinieri hidroteknik i Institutit të Gjeoshkencave, Energjisë, Ujit dhe Mjedisit, Klodian Zaimi, shpjegon për Monitor se është pikërisht kjo tendenca që shfaqin burimet ujore në Shqipëri sipas parashikimeve. Gjasat janë që të kemi 20% sasi uji më pak dhe prurje më ekstreme në dimër dhe shumë më të ulëta në verë. Ndërtimi i hidrocentraleve, ndërhyrjet nga dora e njeriut kanë rolin e tyre në mënyrën sesi natyra sillet me njerëzit, por kryesor mbetet monitorimi i burimeve dhe ndjekja nga afër e ndryshimeve, duke krijuar hartat e rrezikut që minimizojnë dëmet në çdo rast.
“Në lidhje me sasitë, ka studime të ndryshime prandaj kjo është e vështirë për t’u bërë në rang tërësor, por për trupa ujorë të caktuara, është bërë një vlerësim ku ka pasur luhatjet e veta të shtimit dhe të uljes së prurjeve. Kryesisht nga studimet e fundit dhe për pozicionin ku ndodhet Shqipëria, tendenca e gjithë resurseve ujore brenda territorit është për një ulje të sasisë së prurjes ujore deri në 20% në totalin e tyre”, thotë Zaimi.
