Në Ministrinë e Mbrojtjes u zhvillua sot ceremonia e përcjelljes së dy kontigjenteve të Forcave të Armatosura në operacionin ushtarak të NATO-s, Resolute Support Mission në Kabul dhe Herat të Afganistanit.
Në këtë ceremoni ishin të pranishëm ministrja e Mbrojtjes znj. Mimi Kodheli, zëvendësshefi i Shtabit të Përgjithshëm të Forcave të Armatosura gjeneral brigade Dedë Prenga, komandantë forcash, zëvendësambasadori i Republikës së Turqisë në vendin tonë z. Sinan Cem Baş, atasheu ushtarak italian në Tiranë, si përfaqësuesit e dy vendeve nën komandën e të cilëve do të jenë ushtarakët shqiptarë.
Ministrja Kodheli vlerësoi përgatitjen e këtyre dy kontigjenteve dhe shprehu mbështetjen e veçantë për ta dhe familjet e tyre gjatë angazhimit në operacion. “Tashmë, pas përmbushjes me sukses të angazhimit në Forcën Reaguese të Gatishmërisë tepër të lartë të NATO-s, nisim efektivat e kompanisë së parë. Ata morën pjesë me sukses në stërvitjen e NATO-s me vizibilitet të lartë “Trident Juncture-15”, në Capo Teulada, Itali, si dhe në stërvitjet e tjera dislokuese në Poloni, apo Gjermani.”
Dy kontigjentet shqiptare janë pjesë e kompanisë së parë “Zemërluanët” e batalionit të dytë të këmbësorisë dhe do të shërbejnë për një periudhë në Kabul nën komandën e Forcave të Armatosura turke dhe në Herat nën komandën e Forcave të Armatosura italiane.
