Nuk ka asnjë rrezik që vendi ynë të preket nga cikloni “Zorbas”, ndryshe nga Greqia dhe Turqia. Këtë gjë e konfirmon meteorologu Metodi Marku, duke na qetësuar se në Shqipëri nuk do të ketë përmbytje, por vetëm reshje lokale në zonën juglindore.
Ajo çfarë është shqetësuese, është se do të përballemi me zjarret. Rreziku më i lartë do të paraqitet në Lezhë, Shkodër, Durrës dhe Fier.
“Pritet të sjellë shqetësime për Greqinë e jugut dhe Turqinë, për arsye të shpejtësive të larta të erës që ajo do të gjenerojë gjatë udhëtimit të saj nëpër këto dy vende.
Shpejtësia e erës mund të kalojë për momente të shkurta edhe 150 km/h dhe sasitë e reshjeve sidomos në Peleponez, pra në jug të Greqisë mund të arrijnë dhe mbi 200 mm, që do të thotë se ata pritet të kenë shqetësime nga përmbytjet, qoftë edhe të lokalizuara. Për Shqipërinë, në luglindje, në qarkun e Korçës mund të ketë reshje, por të dobëta dhe lokalisht mesatare.
Por ndërsa jugu do të përballet me reshje shiu, disa qarqe të vendit rrezikojnë nga zjarret. Më i lartë rreziku paraqitet në Lezhë, Shkodër, Durrës dhe Fier”, ka thënë ai për “Ora News”.
