Kanabisi është një nga fenomenet që ka shqetësuar qeverinë shqiptare vitet e fundit. Shpesh këtë fenomen e kanë pasqyruar edhe mediat ndërkombëtare. Ndërkohë që ministria e brendshme zotohet të zhdukë kanabisin nga historia e Shqipërisë, Maqedonia fqinje i hap dyert një investimi të ri, që mbështetet tek kanabisi.
Lajmi është njoftuar në mediat maqedonase në muajin prill, por çuditërisht kaloi pa vëmendjen e mediave shqiptare.
Kompania amerikane NYSK holding do të ngrejë një fabrikë për prodhimin e vajit të kanabisit për nevoja mjekësore në Shkup.
Investimi i përgjithshëm për pesë vjet do të jetë mes 3- 5 milionë dollarë. NYSK Holding ka investuar gjysmë milion euro në rinovimin e objektit mbi 2,000 metra katrorë në Shkup. Kompania tashmë ka punësuar 15 persona me orar të plotë dhe me të ardhura mbi mesataren dhe ka në plan që të punësojë 50 persona deri në fund të vitit.
Ministri i Investimeve të Huaja, Xheri Naumof gjatë fjalës së tij theksoi : “Maqedonia është një destinacion të ri për këtë industri dhe kemi pritshmëri se do ketë rritje të shpejtë”.
Zëvendëskryministri dhe ministri i Shëndetësisë, Nikolla Todorov, tha ky investim është rezultat i angazhimeve të qeverisë dhe ministrisë për mundësim të përdorimit të kanabisit në qëllime mjekësore në Republikën e Maqedonisë.
John Montgomery, investitor dhe ekspert, tha se firma do të prodhojnë një marihuanë të cilësisë së lartë mjekësore për të kuruar kryesisht kancerin ose epilepsinë.
