Organizata për Siguri dhe Bashkëpunim në Evropë (OSBE) ka miratuar kandidaturën e Shqipërisë për të marrë kryesimin e organizatës në vitin 2020.
Lajmin e ka bërë të ditur kryesuesja aktuale e OSBE-së, Italia përmes një postimit në “Twitter”. Shqipëria ishte kandidatura me potencialet më të madhe për të marrë kryesimin e OSBE-së në 2020. Theksojmë se nga 1 janari 2019 Shqipëria bëhet pjesë e Trojkës.
Vlen të theksohet se OSBE-ja u krijua gjatë Luftës së Ftohtë, si një forum për dialog mes Lindjes dhe Perëndimit. Ajo sot vepron në tri fusha: ushtarako-politike, ekonomike-ekologjike dhe njerëzore.
Ajo ka selinë në Vjenë dhe mbledh 57 shtete anëtare nga Evropa, Azia Qendrore dhe Amerika e Veriut, të cilat së bashku përbëjnë pjesën më të madhe të hemisferës veriore.
Organizata për Siguri dhe Bashkëpunim në Evropë – është forum dialogu politik për një gamë të gjerë çështjesh të sigurisë si dhe platformë për veprim të përbashkët, me qëllim përmirësimin e jetës së individëve dhe komuniteteve.
Përmes qasjes tërësore ndaj sigurisë, që përbëhet nga dimensionet politiko-ushtarake, ekonomike, mjedisore, njerëzore dhe anëtarësimin përfshirës, OSBE-ja ndihmon në ngushtimin e dallimeve dhe
ndërtimin e besimit ndërmjet shteteve, duke bashkëpunuar në parandalimin e konflikteve, menaxhimin e krizave dhe rehabilitimin pas konfliktit.
Me institucionet e saj, njësitë e ekspertëve dhe operacionet në terren, OSBE-ja trajton çështje me ndikim në sigurinë tonë të përbashkët, përfshirë kontrollin e armëve, terrorizmin, qeverisjen e mirë, sigurinë energjetike, trafikimin e personave, demokratizimin, lirinë e medias dhe pakicat kombëtar.
