Shqipëria është prekur nga virusi i gripit, por jo nga ai i derrit. Të paktën ky ishte mesazhi që përcolli pak çaste më parë shefja e departamentit të kontrollit të sëmundjeve infektive në ISHP, Silva Bino, në tentativë për të qetësuar popullatën. Ajo tha në një prononcim për mediat se nga tre viktimat, dy janë të konfirmuara deri tani nga gripi. Për të shuar zërat se kemi një përhapje të epidemisë së gripit të derrit, Bino nënvizoi se bëhet fjalë për gripin AH1N1, por jo grip derri.
“Ne jemi futur në sezonin e gripit. Gripi ka intensitet mesatar, por në rritje. Në dy javët e fundit ka pasur rritje të rasteve me grip, kjo vihet re me infeksionet respiratore akute, është rritur, pak a shumë i ngjashëm me vitin e kaluar. Virusi që qarkullon është AH1NI, është pak e shumë e ngjashme me vendet e rajonit dhe europiane, përveç Greqisë që ka intensitet më të lartë.
Deri tani janë dy persona që kanë ndërruar jetë, për shkak të gripit, është edhe një person tjetër, por po verifikohet. Një rast është nga Tirana dhe dy nga Elbasani, por rasti i fundit nuk i përket Elbasanit. Ne jemi në sezonin e gripit dhe kemi një rritje të shpejtë. Gripi është AH1N1, por jo grip derri, është virus i përfshirë në vaksinën e gripit.
Personat që kanë vdekur kanë qenë të pa vaksinuar. Vihet re një rritje e formave më të rënda, që shtrohen në spital dhe kanë kujdes për nivel reanimator. Viktimat kanë qenë të moshave 40-60-vjeç, kanë qenë me sëmundje shoqëruese dhe ky është një faktor rreziku”, deklaroi ajo.
