Nga Bled Marku/ Viti 1991, në të gjithë Shqipërinë dëgjohej togfjalëshi “Poshtë komunizmi”, “E duam Shqipërinë si e gjithë Evropa”. Në sheshet e Tiranës u derdhën lume njerëzish për të kundërshtuar regjimin totalitar, që për 50 vite i mori frymën dhe shpresën një kombi.Duke ardhur deri më 20 shkurt, ditën e rrëzimit të bustit të ish-diktatorit Enver Hoxha në zemër të kryeqytetit. Edhe pse kanë kaluar 27 vite. Edhe pse është vendosur pluralizmi politik. Edhe pse ndryshimi është i dukshëm e i prekshëm, pas më shumë se një çerek shekulli togfjalëshi nuk ka ndryshuar ende. Çdo shqiptar, vijon të gënjehet e të gënjejë me shprehjen “e duam Shqipërinë si gjithë Evropa”.
Në pranverë të këtij viti, do të publikohet proces raporti i BE-së dhe do të zbulohet nëse Shqipërisë do t’i jepet dritë jeshile për hapjen e negociatave për anëtarësim ose jo.
Komuniteti Evropian i ka lënë “detyra shtëpie” vendit tonë, ku kryesoret janë: -Reforma në administratën publike, -reformimi dhe pavarësia e gjyqësorit, -vendosmëri në luftën kundër korrupsionit, duke mos lënë jashtë listës miratimin e reformës në drejtësi, si edhe shpalljen e luftës mes politikanëve dhe njerëzve të pushtetshëm që kanë abuzuar me fondet publike dhe me pasurinë nëntokësore e mbitokësore të Shqipërisë. Në vija të përgjithshme, çdo gjë është në rrugë të mbarë dhe të drejtë. Por kur kanë mbetur pak muaj nga publikimi i raportit, Shqipëria kërcënohet nga të katërta anët.
I pari që po ushtron presion është vendi ynë fqinj Greqia. Edhe pse janë zhvilluar disa takime të nivelit të lartë mes krerëve të diplomacive përkatëse, Ditmir Bushati dhe Nikos Kotzias, grekët gjithmonë kanë pretenduar territore ujore dhe tokësore në dëm të Shqipërisë.
Kotzias deklaroi për mediat vendase të shtetit të tij, se në marrëveshjen e arritur me Bushatin, përfitoi 12 milje detare dhe sipas tij, Ditmir Bushati e zhvendosi vijën detare, pasi ka frikë se Greqia do të përdorë veton e saj për të bllokuar negociatat, ashtu siç po deklaron me zë të lartë kundër Maqedonisë.
Pra, Ditmir Bushati po fal det që të marrë një firmë të Greqisë. Dhe për këtë justifikohet me faktin se marrëveshja e ardhshme do të jetë më e mirë se ajo që nënshkroi Sali Berisha dhe Lulzim Basha në vitin 2009 që u shfuqizua nga Gjykata Kushtetuese.
Një kërcënim tjetër për mos hapjen e negociatave për në BE, vjen nga një tjetër vend anëtar i unionit, Holanda. Ish-diplomati dhe ish-këshilltari i ministrisë së jashtme Shaban Murati e ka konfirmuar faktin se shteti Holandez tashmë po i bën presion Shqipërisë për interesa ekonomike, në mënyrë që të votojë pro hapjes së negociatave për anëtarësimin në BE.
Në një shkrim të tij Shaban Murati shkruan: “Një burim i mirinformuar diplomatik bën të ditur se Holanda i ka paraqitur një kusht Shqipërisë, që do t’ia japë votën për hapjen e bisedimeve të pranimit me BE-në, vetëm nëse Shqipëria i akordon asaj pjesëmarrjen e një kompanie holandeze të gazit në procesin e menaxhimit të segmentit shqiptar të gazsjellësit TAP dhe në ndërtimin e rrjetit të gazifikimit të vendit”.
Me këtë shkrim, Shaban Murati bën transparencë në mënyrën se si po tentohet të negociohet për hapjen e negociatave mes Shqipërisë dhe BE-së. Nisur nga këto situata, qeveria shqiptare dhe vetë kryeministri Rama janë në mes të një “zjarri”, ku duhet të bëjnë një zgjedhje.
Ta shesë apo më keq akoma ta falë Shqipërinë, apo të mos e kërkojë hapjen e negociatave këtë pranverë, me kushtin e vetëm që Shqipëria të mos cenohet as territorialisht nga Greqia dhe as ekonomikisht nga Holanda. Edhe pse kryeministri është shpallur si “Skënderbeu” i dytë nga bashkëpunëtorët e tij të ngushtë, ai nuk njihet si një patriot i flaktë.
Kështu që mund të përgatitemi për më të keqen e mundshme në dëm të Shqipërisë vetëm e vetëm që vendi ynë të hapë negociatat për anëtarësim në BE. Të mos harrojmë se edhe vetë Edi Rama, dikur bërtiste me të madhe “E dua Shqipërinë si e gjithë Evropa”./Pamfleti
