Lejet e ndërtimit në Shqipëri nuk ndalen. Shifrat tregojnë një trend të “frikshëm” rritjeje. Harta e lejeve të ndërtimit është zgjeruar në të gjithë qytetet në tremujorin e tretë të këtij viti.
Tirana si qyteti më i madh, ka numrin më të madh të lejeve ndërtimore, ndërsa rritja ka vazhduar që në tremujorin e vitit 2017. Të dhënat e publikuara nga INSTAT, tregojnë se në periudhën e 3-mujorit të fundit. Janë dhënë gjithsej 310 leje ndërtimore, ku 65 kanë marrë miratimin vetëm në kryeqytet.
Në të njëjtën periudhë të një viti më parë në Shqipëri janë dhënë 145 leje ndërtimi. Përgjatë nëntëmujorit janë dhënë gjithsej 608 leje, 27 % e të cilave ose 167 kanë qenë në Tiranë.Në vitin e kaluar janë dhënë 308 leje, ndërsa në vitin 2017 po në të njëjtën periudhë numri i lejeve është dyfishuar, por kjo e shprehur në përqindje shkon në 97% .
Në kryeqytet, për gjithë 9 mujorin janë dhënë 167 leje, me një rritje prej 157% në krahasim me 9 muajt e parë të 2016-s, pra pothuajse me një trefishim, (102 leje më shumë).Pas Tiranës, në vlerë absolute numri më i lartë i rritjes së lejeve të ndërtimit është në Fier, ku janë dhënë 67 leje më shumë, e ndjekur nga Vlora me 48 leje më shumë dhe Durrësi me 38 leje më shumë.
Në tremujorin e tretë 2017 ka një rritje të ndjeshme të lejeve të dhëna në qytetin e Korçës, i cili është kthyer në një destinacion të preferuar turistik, ku janë dhënë 57 leje, nga më pak se 6 leje që janë dhënë mesatarisht tremujorët e mëparshëm.
Në të gjithë vendin ka një orientim të lartë të likuiditeteve të lira në ekonomi në sektorin e ndërtimit, ku më e ndjeshme është në qytetet kryesore, sidomos në Tiranë, Fier, Vlorë, Durrës.
Ekspertët kanë paralajmëruar se kjo ofertë që po krijohet me apartamente është me e lartë sesa kërkesa dhe tregu mund të rrezikojë në flluskë, teksa banesat rrezikojnë të mbeten pa shitur. TIRANA TODAY.
