Një ditë më parë, ish-presidenti Bujar Nishani deklaroi se “deri më 24 korrik 2017, në Institucionin e Presidentit të Republikës nuk është paraqitur asnjë kërkesë nga Qeveria për “Plotfuqishmërinë” lidhur me negociatorët për marrëveshjen e Detit”.
Po pas kësaj date, a ka kërkuar qeveria shqiptare “Plotfuqishmëri” për marrëveshjen me Greqinë?
Burime nga Presidenca për Panorama kanë konfirmuar se deri më tani “nuk është kërkuar asnjë Plotfuqishmëri për negociatat për Marrëveshjen e Detit me Greqinë”.
Çfarë tha Nishani për “Plotfuqishmërinë” e negociatorëve
Deklaroj se deri më 24 korrik 2017 në Institucionin e Presidentit të Republikës nuk është paraqitur asnjë kërkesë nga Qeveria për “Plotfuqishmërinë” ndonëse tashmë shihet qartë se negociatat dhe bisedimet janë zhvilluar edhe përpara kësaj date. Nëse pas kësaj date ka një kërkesë dhe nëse kjo “Plotfuqishmëri” është dhënë apo jo, kjo mbetet për tu mësuar. Por, që pas Vendimit nr. 15, datë 15.04.2010 të Gjykatës Kushtetuese marrja e “Plotfuqishmërisë” për negocimin e Marrveshjes së Detit është detyrim ligjor. Mos zbatimi i këtij Vendimi të GjK përbën vepër të rëndë penale.
