Dhjetë vetë janë vrarë në një sulm me bombë vetëvrasëse pranë kompleksit të agjencisë së inteligjencës në Afganistan në Kabul.
Pesë persona të tjerë u plagosën kur sulmuesi, i cili ishte në këmbë, shpërtheu veten teksa punonjës të agjencisë ishin duke shkuar në punë. Sulmin e ka marrë përsipër ISIS, ndërsa drejtori i spitalit në Kabul tha se numri i viktimave mund të rritet.
Numri i bombave të tilla në Afganistan është rritur gjatë muajve të fundit.
Në tetor, të paktën 39 vetë u vranë në një sulm mbi një xhami që i përket pakicës myslimane shiite.
Në maj, një bombë e madhe në lagjen diplomatike apo në Zonën e Gjelbër vrau më shumë se 150 njerëz – sulmi më vdekjeprurës që kur talebanët u dëbuan nga pushteti nga forcat amerikane në 2001.
Javën e kaluar, ISIS synonte gjithashtu një qendër trajnimi që i përkiste agjencisë së inteligjencës. Grupi xhihadist ka qenë aktiv në Afganistan që nga janari 2015. TIRANA TODAY
