Ish-nënkryetarja e PD-së, Jozefina Topalli ka bërë akuza shumë të forta ndaj Lulzim Bashës. Topalli deklaroi se askush në PD nuk di burimin e saktë të parave që janë përdorur në lidhje me lobimet që Lulzim Basha ka bërë në SHBA. Në një intervistë për “Radio Shkodra”, Topalli kërkon që kreu i demokratëve duhet të shpjegojë burimet se si pagoi një shumë të madhe parash para zgjedhje të 25 qershorit.
Gjithashtu, Topalli ka shtuar se kryedemokrati nuk e ka diskutuar këtë vendim në kryesinë e partisë së tij.
Kujtojmë se ky është reagimi i parë i zonjës Topalli pasi në media u fol për skandalin e lobimit të PD-së.
“Të deklarohet burimi i të ardhurave për paratë që kanë kaluar në firma lobimi offshore. Nuk ka sqaruar asgjë. Basha ka shtuar konfuzionet dhe paqartësitë për kanalet në të cilat kanë kaluar paratë. PD nuk mund të mbajë kosto tjetër dhe akuza kur flasin për para në offshore.
Një gjë është themelore, ai duhet të sqarojë, ai ia ka borxh PD-së të sqarojë. Ai ka lëvizur para, në atë kohë që kam qenë në grup parlamentar. Por në kryesinë e PD nuk ka pasur vendim për këtë gjë.
Vendimet për lëvizjen e parave nuk janë marrë si vendime të forumeve të Partisë Demokratike. Janë vendime private të z.Basha. Ndryshe i paraqet shifrat në deklaratë dhe ndryshe thotë Lulzim Basha, për para që nuk ua dimë burimin, nuk ua dimë kanalet,” deklaroi Topalli.