Ish-nënkryetari i PD-së ka “shpërthyer” para pak minutash kundër personave që po i dalin në mbrojtje Lulzim Bashës, pas humbjes së thellë në zgjedhje.
Në një postim në Facebook, Patozi porosit mbështetësit e Bashës që t’i dalin në krah për t’ia lehtësuar ndërgjegjen, ndërsa ironizon edhe ata që i quan “sharës me pagesë”.
REAGIMI I PATOZIT:
“PËR SHARËSIT ME DHE PA PAGESË
Kam mirëkuptim për të gjithë ata kolegë, ish-kolegë, miq, ish-miq dhe asnjëherëtakuar, që po përdorin kandidimin tim si shkas për t’i qëndruar afër kryetarit të vetëngrirë. Dilini në krah në këto momente të vështira, pasi duhet të mos ndjehet vetëm në dëmin, që i ka bërë PD. Lehtësojani sadopak ndërgjegjen duke marrë përsipër një pjesë të mëkatit të tij.
Vazhdoni e bëjeni dhe kini mirëkuptimin dhe nënvlerësimin tim.
Tek kjo “amnisti” nuk përfshihen sharësit me pagese të kompanisë së posaçme call center, ndonëse qëllimi mund të jetë i njëjtë.
Por një këshillë e kam: thoni ç’të doni kundër meje, vetëm ju lutem bëni kujdes mos përplaseni me njëri-tjetrin, kur të prisni në paradhomë, pasi të keni kaluar skanerin e kunatit.
Mes jush, që e bëni vullnetarisht, dhe mercenarëve, që e bëjnë me lekë, juve më dhimbseni me shumë.
Suksese të gjithëve!”
Mbrëmë, Patozi bëri një deklaratë të fortë, teksa tha se i është ofruar një pazar me Bashën, të cilin ai e kishte refuzuar dhe si pasojë ndodhi skualifikimi i tij si kandidat për kreun e partisë. Pas kësaj deklarate, reagoi Sekretari i Përgjithshëm i PD-së, Arben Ristani, i cili shkruan se ndjen keqardhje që “negocimi” për garanci statusore konsiderohet si pazar, ndërsa duket se deputeti nuk ka përtuar t’u kthejë sërish përgjigje kritikëve të tij dhe mbështetësve të Bashës.
Deklarata e Patozit në Top Story:
Më kanë propozuar që zoti Basha është i prirur të ketë një marrëveshje, pavarësisht asaj që ndodhi. Me mua nuk mund të ketë pazar dhe për shkak se nuk mund të ketë pazar me mua, ndodhi edhe skualifikimi im si kandidat për kreun e partisë, që është një turp i atyre që e morën vendimin, por mbi të gjitha i atij që e bëri propozimin dhe ky është zoti Basha.
Reagimi i Arben Ristanit:
Në përmbushje të detyrave të mia si Sekretar i Përgjithshëm i PD dhe në interesin e saj më të mirë, kam bërë përpjekje që gara për kryetar të PD të ofrojë garanci statutore, gjithëpërfshirje dhe të jetë një proces bashkimi për partinë ashtu sikurse një proces emancipimi për të gjithë shoqërinë!
Keqardhje që “negocimi” për garanci statutore dhe kushte të barabarta gare konsiderohet si pazar.
Pazari nuk ka qenë dhe nuk është pjesë e moralit tim ashtu sikurse i kulturës politike të PD.
Patozi u përgjigjet kritikëve, të cilët i quan “sharës me dhe pa pagesë”:
