Fotoja me Presidentin e Turqisë, Recep Tayyip Erdogan përpara Botërorit vazhdon të trazojë kombëtaren gjermane. Së fundmi ka reaguar edhe presidenti i Federatës Gjermane të Futbollit, Reinhard Grindel. Ai i kërkoi sërish Mesut Ozil që duhet të dilte dhe të sqaronte tifozët për këtë situatë: “Mesut Ozil nuk ka bërë asnjë koment deri tani. Tifozët presin përgjigje me të drejtë. Mesut, kur të kthehet nga pushimet, duhet të bëjë një deklaratë publike”, tha Grindel në një intervistë për “Kicker”.
Nga ana tjetër Mesut Ozil nuk ka pranuar edhe më parë që të flasë për këtë çështje, pasi ka mbetur i zhgënjyer dhe i fyer nga trajtimi që i është bërë kombëtaren gjermane. Mustafa Ozil, babi i Mesut shprehet se i ka këshilluar djalit të tij që të mos luajë më me kombëtaren e Gjermanisë në të ardhmen.
“Nëse do të isha në vendin e tij, do të thoja mjaft më. Mesut është fyer dhe zhgënjyer para Botërorit, në ndeshjen miqësore ndaj Austrisë.
Askush nuk i doli në mbrojtje edhe pse ka 9 vjet që luan me fanellën e Gjermanisë. Njerëzit gjithnjë shprehen se nëse Gjermania fiton kjo është meritë e grupit, por nëse humbet kjo ndodh për faj të Ozil. Kjo është e turpshme”, – u shpreh Mustafa Ozil.
“Mesut ka qenë një shembull gjatë gjithë këtyre viteve, ndaj po krijohet një situatë absurd. Ai e do Gjermaninë dhe e ka treguar gjithnjë këtë gjë, ndaj nuk është e ndershme të trajtohet në këtë mënyrë.
Nuk është hera e parë që Mesut del në fotografi me Erdogan, por politika nuk ka përse të përzihet në çështjet private të lojtarit. Ne nuk jemi marrë asnjëherë me politikë, Mesut është një sportist dhe futbolli nuk ka të bëjë me politikë”, – tha Mustafa Ozil, që këshillon djalin 29-vjeçar të mos luajë më me kombëtaren gjermane.
