Humbja 4-0 në Kukës tek Partizani duket se ka nxehur gjakrat tek të gjithë. I pari që reagoi ishte pikërisht trajneri Dalipi i cili pas ndeshjes u shpreh se lojtarët duhet të japin më shumë, pasi fanella është mjaft e rëndë. Humbja me Kukësin ishte shumë e ashpër, pasi vinte në një moment kyç për vazhdimësinë e kampionatit. Pas kalimit të inatit fillestar, presidenti Demi ka vendosur që të thërrasë stafin në një mbledhje për të diskutuar për humbjen me verilindorët.
Gaz Demi ka kërkuar një mbledhje urgjente me të gjithë lojtarët dhe drejtuesit. EDS ka zbuluar dhe diskutimin që është bërë në këtë mbledhje, ku Demi nuk ka qenë aspak i acaruar apo të flasë me tone të ashpra, ai ka kërkuar që të gjithë të kenë besim tek trajneri Dalipi. “Çfarë ishte ajo ndeshje? Humbje e rëndë, duhet të kthehemi aty ku duhet. Kërkoj nga të gjithë ju që të keni besim te trajneri Dalipi. Unë kam besim te numri një i stolit dhe dua që të keni dhe ju”, – tha ndër të tjera numri një i klubit. Demi nuk ka marrë asnjë masë ndëshkuese për lojtarët e tij. Numri një i klubit kërkon ta kalojë me qetësi këtë situata, pasi nuk do që të fusë ekipin në presion para ndeshjes me Skënderbeun.
Të kuqtë kishin 5 ndeshje pa humbur duke koleksionuar 4 fitore, 1 barazim, 8 gola të shënuar dhe 0 të pësuar. Takimi i 6-të i trajnerit Klevis Dalipi do të mbahet mend gjatë, pasi ishte humbja e parë dhe më e rënda për të. Deri tani, trajneri krenohej me faktin se nuk kishte pësuar gola, ndërsa vetëm kundër kuksianeve e nxori 4 herë topin nga rrjeta. Sulmi inekzistent dhe një ekip pa busull. Partizani ndodhet në vendin e 3-të me 45 pikë, 9 më pak se Kukësi i vendit të dytë dhe 1 më shumë se Luftëtari i vendit të 4-ët.
