Komuna e Deçanit ka shpallur gjendjen e jashtëzakonshme, ku deri më tani flitet për 2 të vdekur dhe 900 persona që kanë kërkuar ndihmë mjekësore nga helmimi i ujit.
Lajmin e ka bërë të ditur kryetari i kësaj komune, Bashkim Ramosaj. Në vendimin që e ka marrë kjo komunë thuhet se “obligohen të gjitha institucionet e nivelit lokal për ngritjen e gatishmërisë për menaxhimin e kësaj situate emergjente të ndodhur pas helmimit të fundit”.
“Me propozimin tim, sot kemi mbajtur takim emergjent me anëtarët e Komitetit për Politikë dhe Financa, të cilët unanimisht votuan për ndarjen e shumës në vlerë prej 5000€, të cilat do të dedikohen për nevojat e terapisë së qytetarëve të cilët po përballen me epideminë e shfaqur ditëve të fundit në komunën e Deçanit!”.
Të paktën 900 persona që nga dita e shtunë kanë kërkuar ndihmë mjekësore, ndërsa paraprakisht dyshohet se janë helmuar nga uji i pijshëm.
