Një rast i paprecedent i ndodhur pak ditë më parë në Shkodër, ku një i ri sulmoi me thikë trajnerin e Vllaznisë, Ernest Gjokën. Autorët e këtij sulmi janë vënë para drejtësisë dhe tashmë pritet zbardhja e plotë e ngjarjes. Pasi vetë trajneri Gjoka është shprehur se ky që veproi është “dora”, “koka” është dikush tjetër. Ndërsa për habi nuk kemi pasur akoma asnjë reagim nga Shoqata e Trajnerëve, e cila duhet të kishte ngritur zërin e para për këtë çështje që cenon shumë futbollin. Por kjo heshtje vërteton se ajo është “fantazmë” dhe këtë e vërteton edhe deklarata e teknikut Starova:
“Mund t’iu them diçka që ta keni si lajm: Unë nuk di të jem thirrur ndonjëherë në ndonjë mbledhje të shoqatës së trajnerëve. Asnjëherë! Besoj se nuk do koment më shumë. Sa i përket incidentit me Gjokën, raste të tilla kanë ndodhur me shumicë në vitet ’90 deri në 2000-shin. Vinin të fortët, gjuanin penalltitë dhe ne prisnim sa të mbaronin ata, ose i merrnin topat fare dhe largoheshin. Rasti i Gjokës është i paprecedentë në ditët e sotme. Dëmton imazhin e vendit dhe futbollit tonë edhe jashtë. Shpresoj që kjo të harrohet dhe shyqyr që Nesti ka shpëtuar pa dëmtime”, shprehet Starova.
