Dani Alves prej muajsh është jashtë fushave të blerta për shkak të një dëmtimi. Mbrojtësi i PSG-së në një intervistë për “Goal” u shpreh se Kylian Mbappe duhet të bëjë akoma shumë për të arritur në nivelin e shokut të skuadrës, Neymar. 19-vjeçari po përjeton një periudhë fantastike që nga shpërthimi i tij te Monaco në edicionin 2016-2017, por u transferua te PSG-ja vitin e kaluar dhe ishte pjesë e kombëtares franceze në Kupën e Botës.
Megjithatë, duke folur për shokët e skuadrës te PSG-ja, Dani Alves ndjen se bashkatdhetari i tij është disa hapa më larg. “Unë besoj se Neymar dhe Mbappe kanë profile të ndryshme”, tha ish-mbrojtësi i Barcelonës në një intervistë të gjatë për “Goal”. “Mbappe do të bëhet një nga lojtarët historikë në futboll, por unë besoj se Neymar tashmë e ka arritur këtë nivel. Mbappe është ende në proces për të arritur atje.
Por, unë mendoj që, nëse Mbappe është i zgjuar, nuk do ta humbasë mundësinë për të mësuar nga Neymar. Unë e them këtë për shkak se edhe Neymar mësoi shumë nga Lionel Messi. Është një zinxhir i të mësuarit, një rend. Unë dua ta ndihmoj, të jem atje për të, edhe kur askush tjetër nuk është. Jam gjithmonë aty, për të.
Do të doja të bëhesha i rëndësishëm për të, kur Mbappe nuk funksionon mirë. Besoj se e kam këtë tipar të karakterit dhe do të jem në gjendje ta ndihmoj, ta bëj sa më racional në vendime dhe një person më të mirë. Është e vështirë të përmirësosh dikë, si lojtar, por është më e lehtë ta ndihmosh që të bëhet një person më i mirë”.
