Zaptimi i hapësirave publike nga automjetet në kryeqytetin tonë është kthyer në një problem të madh për këmbësorët, por jo vetëm.
Nuk ka rëndësi nëse rruga është e vijëzuar për kalimin e këmbësorëve, sepse edhe aty makinat do ta zaptojnë hapësirën, duke detyruar qytetarët të kalojnë në mes të rrugës.
Herë trotuaret, herë hapësirën e vijëzimit për kalimin e këmbësorëve, herë stacionin e autobusëve: të gjitha këto hapësira i gjen të zaptuara kudo në kryeqytet.
Dy raste të tilla janë raportuar sot në redaksinë e Tirana Today, ku shkeljet nga drejtuesit e automjeteve janë shënuar pranë ministrisë së Mjedisit.
Siç duket nga fotot, njëra nga automjetet ka zënë hapësirën e destinuar për kalimin e këmbësorëve, të cilëve në fakt duhet t’u jepet përparësi nga shoferët, por në këtë rast, drejtuesi i mjetit ka parkuar aty, duke bllokuar mundësinë e kalimit.
Vetëm pak metra më tutje, një tjetër automjet ka ndaluar në stacionin e autobusit, e cila përbën po ashtu shkelje.
Duket se tashmë edhe qytetarët që janë këmbësorë hasin vështirësi në qarkullim, për të mos folur për personat që lëvizin me biçikleta, ndërsa të favorizuarit janë si gjithnjë ata me makina, të cilët njëkohësisht shkaktojnë gjullurdi në qarkullim.
