Kandidati i Lëvizjes BESA për komunën e Çairit në Shkup, Zeqirija Ibrahimi, ka deklaruar se është koha që kjo komunë të “çlirohet” nga drejtimi i Izet Mexhitit, nga BDI.
Në një takim me elektoratin e Çairit, Ibrahimi tha se ka ardhur koha që kjo komunë të çlirohet nga pengmarrja që i kanë bërë këto 12 vite:
“Numri i mashtruesve në këtë fushatë është shtuar shumë, por megjithatë ne do të jemi këtu për të dëshmuar se nuk janë të gjithë pjesëmarrësit në këtë fushatë parazgjedhore mashtrues. Kanë mbetur edhe pak ditë që ta çlirojmë këtë komunë nga pengmarrja që i kanë bërë këto 12 vite këta që kanë keqqeverisur me të.”
Ndër të tjera, Ibrahimi tha se BDI duhet të kërkojë falje për keqqeverisjen e Çairit dhe jo të kërkojë sërish vota.
“Partia që deri tash ka keqqeverisur me Çairin tonë, në vend që të dalë të kërkojë falje për shëmtinë e degradimin që ia ka bërë Çairit, akoma ka guxim të dalë të kërkojë votën e qytetarëve”, ka thënë ndër të tjera Ibrahimi.
BESA synon marrjen e kësaj komune në kuadër të zgjedhjeve të pritshme lokale.
