Një ngjarje e rëndë u regjistrua në Pukë në orët e para të ditës, ku nga shkrumbimi i banesës humbën jetën burrë e grua, duke lënë jetim katër fëmijë. Petrit dhe Dava Ndoj, 40 dhe 35-vjeç po flinin në katin e dytë të banesës, në momentin kur shtëpia e tyre, në lagjen ‘Va Shënkoll’ të fshatit ‘Breg’, është përfshirë nga flakët rreth orës 02:00 të mëngjesit të kësaj të hëne.
Burimet bëjnë me dije se fëmija më i madh 12-vjeç, ka arritur të shpëtojë gjyshen nga flakët, e cila ishte e paralizuar. Alarmin për zjarrin e ka dhënë i zoti i shtëpisë, Pal Ndue Gjoni, 82-vjeç.
Ai kishte dëgjuar zhurmën e tjegullave. “Dëgjova tjegullat që kërcisnin, më doli gjumi”, ka thënë më tej ai. “Thirra djalin që të nxirrte gruan që e kam të paralizuar. U gëzova kur pashë që fëmijët ishin në oborr. Ajo që më ndodhi mua, mos i ndodhtë njeriu”.
Katër fëmijët, më i madhi 12-vjeç janë hedhur nga dritarja e katit të dytë. Ata kanë marrë disa dëmtime të lehta. Po kështu raportohet se dy të moshuarit janë strehuar tek të afërmit, në një banesë në fshat.
Trupat e pajetë të çiftit të bashkëshortëve u gjetën pranë njëri-tjetrit, teksa kishin tentuar të dilnin nga dhoma.
Forcat zjarrfikësve, pasi kanë neutralizuar flakët, u janë dashur rreth dy orë për gjetjen e trupave nën mbetjet e zjarrit.
Tragjedi në Pukë/Banesa përfshihet nga flakët, humbin jetën burrë dhe grua
