Policia Kufitare e qarkut të Shkodrës godet një tjetër tentativë për trafik të lëndëve narkotike.
Shërbimet Policisë Kufitare, gjatë patrullimit në kufirin jeshil, në afërsi të piramidës A-2-9/1, kufi me Malin e Zi, në vendin e quajtur Bukoviç, mbi fshatin Brigjë, Hot, Njësia Administrative Kastrat, Malësi e Madhe, në orët e para të mëngjesit kanë sekuestruar rreth 48 kg lëndë narkotike Cannabis Sattiva.
Sipas të dhënave, policia me anë të kamerave termike ka konstatuar disa persona që po lëviznin në drejtim të Malit të Zi, duke transportuar dy thasë ku dyshohej se ishin me lëndë narkotike.
Menjëherë shërbimet e Policisë Kufitare kanë njoftuar Forcën Operacionale të Kufirit si dhe Sektorin Kundër Narkotikëve në D.V.P Shkodër.
Personat porsa kanë parë se po i ndiqte Policia, kanë fshehur lëndën narkotike dhe janë larguar në drejtim të pyllit.
Si rezultat i krehjes së zonës u gjetën dhe u sekuestruan në cilësinë e provës materiale dy thasë, brenda të cilëve kishte 44 pako me peshë rreth 48 kg lëndë e dyshuar narkotike Cannabis Sattiva.
Shërbimet e Policisë vijojnë krehjen e zonës për të bërë të mundur kapjen e personave që transportonin lëndën narkotike.
Materialet proceduriale i kaluan Prokurorisë Pranë Gjykatës së Shkallës së Parë Shkodër për veprën penale “Trafikimi i narkotikëve e mbetur në tentativë” .
