Kampionati në Maqedoni këtë sezon është dominuar totalisht nga Shkëndija e Tetovës, e cila ka një diferencë të madhe pikësh nga vendi i dytë Vardar, plot 23. Një ditë më parë këto dy ekipe u përballën me njëra-tjetrën, në fushën e Vardarit dhe kuqezinjtë fituan me rezultatin 3-2 në derbin e javës së 28-të.
Pas këtij triumfi futbollistët e skuadrës tetovare kanë festuar dhe kënduar në dhomat e zhveshjes “Ole, ole” dhe “Shkëndija kampione”. Kjo festë duket se i ka inatosur shumë lojtarët e Vardarit të cilët qëndronin tek dhomat ngjitur dhe janë larguar kokë ulur nga stadiumi, pasi drejtuesit u kishin ndaluar edhe komunikimin me mediat.
Por inati ka qenë më i madh se duket dhe ditën e sotme disa lojtarë kanë shpërthyer në rrjetet sociale duke bërë ironi me kampionët e Shkëndis. Disa nga futbollistët e Vardarit mllefin e tyre e kanë shprehur sot nëpër rrjete të ndryshme sociale. Ka reaguar portieri Filip Gacevski, i cili në Facebook-un e tij i është drejtuar Visar Musliut për një video të publikuar në Instagram.
“Visar Musliu” të shoh në instagram ke vendosur një video Vardar, Vardar ma mng. Nuk të vjen turp, ti je një turp i madh, njeri pa shpirt, ke harruar se Vardarit të bëri reprezentues, turp që mbron ngjyrat e reprezentacionit. Zoti është i madh dhe Vardari është institucion-Mbaje mend Vardari është Maqedoni”, ka shkruar Gacevski.
“Le të gëzohen pak idiotët nga Tetova pas kaq torture prej katër vjetësh, të shohin se si është te jesh në krye. Plus gjithashtu i pret të hyjnë edhe në grupe dhe në Champions”, shkruan me ironi Boban Grncarov.
“Kur Shkëndija do të bënte së paku nga ajo që ka Vardari atëherë gëzohuni… mirëpo si njerëz …edhe njëherë treguat se me festë të tillë jeni klub i vogël, pa histori dhe asgjë pas jush! Në përjashtim të disa lojtarëve që pa dallim i respektoj dhe kam luajtur me ta.
PS:respektoni kolegët pa dallim se në cilin klub luani dhe tregoni pak respekt të vogël. Urime titullin!!! Dhe mos harroni .. Vardari është një. Përshëndetje sportive”, ka shkruar ish-lojtari i Vardarit Boban Nikolov. Pas 28 javësh Shkëndija ka 23 pikë më shumë se Vardari, të cilët ka një kohë të gjatë që janë dorëzuar nga titulli kampion.
