Pandemia e koronavirusit e ka fiksuar si asnjëherë më parë botën pas viruseve. Por prova të reja zbulojnë se njerëzit as që e vënë re shtrirjen e madhe të viruseve brenda nesh. Një studim i ri ka identifikuar mbi 140.000 specie virale që banojnë në zorrën e njeriut.
Ky katalog gjigant, është edhe më mahnitës për shkak të faktit se mbi gjysma e këtyre viruseve ishin më herët të panjohura për shkencën. Nëse zbulimi i dhjetëra mijëra viruseve të reja, tingëllon si një zhvillim alarmant, kjo është plotësisht e kuptueshme. Por studiuesit thonë se ne nuk duhet të trembemi për atë se çfarë përfaqësojnë në fakt këto viruse brenda nesh.
“Është e rëndësishme të mbani mend se jo të gjitha viruset janë të dëmshme. Ato përfaqësojnë një përbërës integral të ekosistemit të zorrëve”-shpjegon biokimisti Aleksandër Almeida nga Instituti i Bioinformatikës dhe Biologjisë Molekulare Evropiane (EMBL-EBI).
“Mostrat e përdorura në studim erdhën kryesisht nga individë të shëndetshëm, të cilët nuk kishin ndonjë sëmundje specifike”- thekson ai.
Katalogu i ri i viruseve – i quajtur Gut Phage Database (GPD) – u përpilua duke analizuar mbi 28.000 metagjenomë individuale – të dhënat e disponueshme për publikun mbi sekuencimin e ADN-së tek mostrat e mikrobiomës në zorrë të mbledhura nga 28 vende – së bashku me thuajse 2.900 gjenomë referuese të baktereve të kultivuara të zorrës.
Rezultatet zbuluan 142.809 specie virale, që banojnë në zorrën njerëzore, dhe që përbëjnë një lloj specifik të virusit të njohur si bakterofagë, që infekton bakteret, përveç organizmave njëqelizorë të quajtur arkea.
Në mjedisin misterioz të mikrobiomës së zorrëve – i banuar nga një përzierje e larmishme e organizmave mikroskopikë, që përfshin si bakteret ashtu edhe viruset – bakteriofagët mendohet se luajnë një rol të rëndësishëm, duke rregulluar si bakteret ashtu edhe shëndetin e zorrëve.
“Bakteriofagët ndikojnë shumë në bashkësitë mikrobiale, duke funksionuar si vektorë të transferimit të gjeneve horizontale, duke koduar funksionet e qasjes për të strehuar specie bakteriale dhe për të promovuar ndërveprime dinamike bashkë-evolucionare”-shkruajnë studiuesit në studimin e tyre.
Ndërkohë, hulumtimi tregon se mbi një e treta (36 për qind) e grupeve virale të identifikuara, nuk janë të kufizuara për të infektuar vetëm një specie bakteresh, gjë që do të thotë se ato mund të krijojnë rrjete të flukseve gjenike nëpër speciet bakteriale që janë gjenetikisht të afërta.
Për më tepër, studiuesit gjetën 280 grupe virale të shpërndara globalisht. “Studimi i bakteriofagëve, po përjeton aktualisht një rilindje”- thotë mikrobiologu Trevor Louli nga Instituti Wellcome Sanger.
“Ky katalog me cilësi të lartë dhe në shkallë të gjerë i viruseve njerëzore të zorrëve vjen në kohën e duhur, dhe do të na shërbejë si një plan për të drejtuar analizat ekologjike dhe evolucionare në studimet e ardhshme të viruseve”-thekson ai. Të dhënat e këtij studimi u botuan në revistën “Cell”.
Burimi i lajmit: https://www.sciencealert.com/scientists-identify-140-000-virus-species-in-the-human-gut-and-most-are-unknown
Përshtatur nga TIRANA TODAY
