Ministri i Brendshëm në Kosovë, Bejtush Gashi është shkarkuar nga detyra. Mësohet se shkarkimi i ministrit është bërë nga partia e Behgjet Pacollit, AKR.
Sekretari Organizativ i AKR-së, Rrahim Pacolli ka konfirmuar lajmin e shkarkimit. Në vend të Gashit pritet të emërohet Ekrem Mustafa.
Rrahim Pacolli ka deklaruar se shkarkimi i tij vjen pasi nuk ka treguar performancë të mirë në detyrën e ministrit.
“Po, është e vërtetë që ai është shkarkuar nga ana e partisë. AKR-ja gjithmonë i ka ndërruar ministrat e saj. Kjo po bëhet për shkak të performancës. Çdo ministër i AKR-së, duhet të japi më shumë punë në të mirë të qytetarëve”, tha për Express Rrahim Pacolli.
Shkarkimi i Gashit nga detyra vjen në kohën kur Kosova është duke pritur votimin për anëtarësim në INTERPOL.
