Haki Çako është larguar sot nga posti i kreut të Policisë së Shtetit, me vendim të ministrit të Brendshëm Fatmir Xhafaj, firmosur nga kryeministri Edi Rama.
Por, kujt i është besuar posti i kreut të Policisë së Shtetit?
Në vend të Çakos, në postin e drejtorit është komanduar Rebani Jaupi, ndërsa mësohet se dy kandidatët për postin e Çakos janë Ardi Veliu dhe Eduart Merkaj.
Jaupi mbante postin e zv/drejtorit të Policisë së Shtetit, ndërsa gjatë emërimit të tij Haki Çako e pati vlerësuar Jaupin, si një ndër ekspertët më të mirë të policisë në fushën e krimeve ekonomike e financiare, me një karrierë të pastër e profesionale në Policinë e Shtetit.
Jaupi më herët ka mbajtur postin e Shefit të Sektorit për Krimin Ekonomik e Financiar, në Drejtorinë për Krimin Ekonomik e Financiar në Drejtorinë e Policisë së Shtetit.
Me lirimin nga detyra të Çakos, pritet që të ketë lëvizje të tjera në të gjitha drejtoritë e policisë në qarqe, por edhe në struktura të tjera.
Pas lirimit nga detyra ministri Xhafaj pati një takim me Çakon duke e falënderuar për punën dhe bashkëpunimin e deritanishëm, ndërsa shtoi se mandati i ri qeverisës kërkon një ritëm më të shpejtë dhe dinamikë të madhe pune.
“Realizimi i objektivave të këtij mandati qeverisës, në fushën e rendit dhe sigurisë publike, sfidat që e presin Policinë e Shtetit, kërkojnë një ritëm më të shpejtë dhe dinamikë të madhe pune. Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit.
Puna e kësaj të fundit, domosdoshmërisht duhet të jetë e orientuar drejt rezultateve konkrete, me qëllim që t’u përgjigjet, kësisoj, më mirë kërkesave të kësaj faze të re dhe pritshmërive të larta të publikut dhe partnerëve ndërkombëtarë ndaj Policisë së Shtetit”, deklaroi Xhafaj.
