Ministria e Financave vijon me shitjen e pronave të ish-firmave piramidale në ankande. Ankandi i radhës do të zhvillohet më 8 gusht për shitjen e disa pasurive të firmës Leka.
Pasuria e firmës Leka e cila ka dalë në ankand, është një ndërtesë dhe një truall me sipërfaqe përkatësisht 311 metra dhe 17 mijë metra katrorë. Vlera e ndërtesës sipas Ministrisë së Financave llogaritet 9 milionë lekë, ndërsa vlera e truallit 17 milionë lekë.
Vitin e kaluar Drejtoria e Drejtimit të Pronës Publike pranë Ministrisë së Financave nxori në shitje edhe disa prona të tjera të ish-firmave piramidale ku kishte pasuri të Vefës, Kamberit dhe Xhaferrit. Ishin apartamente, dyqane, dhe një pulari e firmës Kamberi. Pas konfiskimit të pronave të ish-firmave piramidale dhe ndarjes së një pjese prej tyre, këto janë të vetmet pasuri të mbetura.
Dimë se viti tragjik 1997 ishte pasojë e skemave piramidale në Shqipëri, që e filluan aktivitetin e tyre në vitin 1991, dhe falimentuan pasi kishin grumbulluar rreth 1.2 miliardë dollarë kursime të shqiptarëve.
