Shfaqet për herë të parë, në Tiranë, dokumentari për ish-të përndjekurin politik Daut Gumeni. Dokumentari me titullin “Një burrë në udhë” paraqet jetën e Gumenit në vitet e diktaturës, kur u dënua dy herë. Gumeni rrëfen gjithë kalvarin e vuajtjeve të tij nën regjimin komunist
Dokumentari u transmetua në një nga kinematë e Tiranës. I pranishëm në aktivitet ishte dhe kryeministri Edi Rama me bashkëshorten por dhe kreu i FRD-së, Bamir Topi. Kryeministri para këtij aktiviteti sapo hapi dyert e “Shtëpisë së Gjetheve” si muzeu më i ri i Shqipërisë.
Ja cili është Daut Gumeni
Ish-i përndjekuri politik, Daut Gumeni, i cili këto ditë ka hapur dosjen e dënimit të tij, ai rrëfen gjithë kalvarin e vuajtjeve të tij nën regjimin komunist.
Gumeni u dënua dy herë në periudhën e regjimit diktatorial të Enver Hoxhës, një herë në vitin 1967 dhe një tjetër në vitin 1969.
Pas një hetuesie të gjatë, më 21 shtator 1967, gjykata e Tepelenës vendosi të deklarojë fajtor Daut Gumenin, për krimin e tradhtisë ndaj Atdheut, me anën e arratisjes së mbetur në tentativë dhe të dënohet me 20 vjet heqje lirie.
Për të u kërkua 25 vjet, por gjykata, nisur nga mosha e re e z. Gumeni, vetëm 24 vjeçare, e uli me 5 vjet dënimin. Dënimi përmbante edhe humbjen e të drejtave elektorale për pesë vjet dhe konfiskimin e pasurisë së luajtshme dhe të paluajtshme.
Në gusht të vitit 1969 transferohet në burgun e Spaçit, ku tok me bashkëvuajtësit e tjerë punonte në minierë, në kushte çnjerëzore. Në këtë kohë, Daut Gumeni akuzohet përsëri se, në bashkëpunim me të vëllanë, kishte zhvilluar agjitacion e propagandë kundër pushtetit popullor dhe, pas një viti të gjatë në hetuesi dhe gjyqit të dytë në Tepelenë, dënohet përfundimisht me 25 vjet heqje lirie.
Por, kur pyetet se çfarë do t’u thoshte persekutorëve dhe denoncuesve të tij, nëse do të gjendej një ditë përballë tyre, Gumeni shprehet se “për të qenë i sinqertë deri në fund, kafe me ta nuk do të pija kurrë. Por, që t’u uroja që të pësonin më keq se çfarë i kanë bërë vetes, atë nuk ua uroj”.
