Temperaturat e larta vazhdojnë të shkaktojnë vatra zjarri, teksa në 24 orët e fundit, janë shfaqur 9 të tilla në banesa, një magazinë dhe pyje e kullota.
Emergjencat Civile njoftojnë që si pasojë e zjarreve ka pasur vetëm dëme materiale, ndërsa janë angazhuar 14 mjete zjarrfikëse në këto 9 raste zjarri dhe rreth 70 forca për të ndërhyrë dhe vënë nën kontroll flakët dhe minimizuar dëmet; ndër to 30 zjarrfikës, 30 pjesëtarë të forcave të armatosura dhe rreth 10 policë të FNSH.
Vatrat e zjarrit janë regjistruar në Tiranë, Shkodër dhe Dibër, ndërsa në qarkun e Elbasanit dhe Fierit janë konstatuar 4 vatra zjarri në shkurre dhe kullota me dëme të konsiderueshme, kryesisht djegie të pishave.
Gjithashtu, Emergjencat Civile kanë vënë në dispozicion një numër ku qytetarët mund të lajmërojnë në rast se konstatojnë vatra zjarri, duke telefonuar në 112, 129, apo 0694110198.
