Arsen Muskurti, autori i dyshuar i vrasjes së vëllait të tij Dritanit dhe kunatës Nora Muskurti, ka shpjeguar para hetuesve se kishte një marrëdhënie të tensionuar më të vëllain, prej vitit 2017. 38-vjeçari që ndodhet nën masën e “arrestit me burg”, ka zbuluar tërë dinamikën e ngjarjes së rëndë. Sipas tij, i vëllai i ndjerë ka qenë kërcënues ndaj tij.
“Me Dritanin dhe Nora Muskurtin kam patur problematika të vazhdueshme prej vitit 2017, për shkak se ai ka qenë një person që nuk pranonte kërkesë llogarie, dhe shpesh ishte kërcënues ndaj meje. Për këtë shkak unë kam bërë edhe kallëzim në komisariat”, shpjegon autori i dyshuar.
Hetuesit janë duke i marrë me rezerva deklarimet e tij, derisa përmes dëshmive dhe provave të tjera t’i sqarojnë ato. I dyshuari ka thënë se me vëllain ishin në proces gjyqësor, edhe për një shumë të konsiderueshme parash, ku thotë se kishin kërkuar ekspertim të firmës, duke pretenduar se ia kishin falsifikuar. Ai tha më tej se kishte marrë armën dhe kishte shkuar në agjenci për t’u sqaruar.
“Duke u mbledhur në të gjitha këto probleme, pësova tronditje. Mora armën dhe shkova në agjenci për t’u sqaruar. Sapo kam hyrë i kam drejtuar armën dhe i thashë: “Pse më shantazhon mua, fëmijët e mi, nënën dhe babën. Ai m’u përgjigj me fjalët “du me e bë”.
Atëherë kam qëlluar me armë drejt Dritanit dhe nuk di ç’kam bërë me tej. Jam larguar për tek dyqani im që e kam aty pranë dhe kam futur armën në kasafortë. Më pas kam shkuar në shtëpinë time në Rrugën “5 Maji”. Jam ndërruar dhe kam thirrur avokatin tim. Rrobat e krimit i kam hedhur në një kazan plehrash”, ka shpjeguar Arsen Muskurti, raporton BalkanWeb.
Dritan dhe Nora Muskurti u vranë brenda agjencisë së tyre të udhëtimeve, në një rrugicë pranë xhamisë “Dine Hoxha” në Tiranë më 30 gusht. Arsen Muskurti hyri qetësisht në agjenci dhe qëlloi me pistoletë dhe më pas u largua për t’u kapur disa orë më vonë në zonën e “5 Majit”.
Ende i pa penduar për krimin, Arsen Muskurti është shprehur se vëllai e kunata e meritonin të vdisnin pas konflikteve të vjetra për pronësinë, që vazhdimisht i kishte çuar të dyja palët në dyert e policisë.
